(1909) Carta de Xüan soldau
Setiembre ventidós, 'nel
campamentu del Zocu.
Padre míu: Toy contentu
pos miániques soy quintu con fortuna,
que apenes dexé'l barcu, ya entré'n una
aición pa dir zurrayos la bandana
á esti diañu de xente mosulmana,
y enduviellóse tantu la partida,
que gracies á una neña toy con vida.
Voy a contai el casu, aunque barrunto
que non me va a creer lo que yo i cunto,
y a no ser por Xiromo el de Sabina
que a mi vera pasó la tremolina,
quiciáes dalgún oyéndome creyera
que yo taba lloriau de la sesera,
pos ye cosa que plasma y maraviella;
pero xuroi, mio pá, que non ye grilla.
Cuando ya de embarcar estaba ceo
lluciendo la fegura per Uvieo,
topé con una moza tan galana,
que llucero non vi pe la mañana
faciendo al nuevu sol una veyura
que pudiés comparase á so hermosura.
Vi que al mirála parpadió contenta;
acerquéme a falar, y oyóme atenta,
y, la verdá, non punxo mala cara;
cosa que bien mirao, non ye rara:
lo contrario, prodixu fuera el velo,
pos tien una carina com 'un cielo,
y en metá de la cara dos güeyinos
que en el alma facíen regolvinos.
Fuxó el tiempu pa mí muncho lixeru,
y del cuartel salió el toque guerreru
que con claru llenguaxe nos decía:
"ye la hora de partir pa morería".
Arrollándoi al par de los sos güeyos
dos llagrimines como dos arbeyos,
dixo ansí, selemente, la mió neña:
-Partes, Xuanín, pa tierra bien lexana,
y anque de tus promeses toi ufana,
sé que Dios, por disgracia, al home fizu
per abondo veleru y tornadizu.
Una preba, anque non la necesite,
del mió cariñu tienru voy purrite;
que de xuro ablandaren una peña,
pos sé que non la dexes nin destruyes
mientres guardes del tuyu faraguyes.
Mas si el tó amor non ye como presumu,
al par d'aquélla desfaráse en fumu-
dixo-; y dándome un puru del estancu,
como blima doblóse en metá el bancu.
Yo i contesté: -Non temas, neña mía,
que de mió llau s'aparte un solu día;
pos vien de tos manines, sé que el puru
talismán pa'l peligru ye seguru;
y al llau del corazón ú bien se apaña
comigo va facer toa la campaña.
Y ansina fo. Al triscar pe les lladeres
del monte Gologú de les chumberes
onde los moros taben gazapaos,
tiraben al descuidu a los soldaos
un rifeñu, tan prietu como el barru,
un disparu llargóme a boca xarru;
y apuntó com'un diañu aquel lladrón:
¡venía el tiru derechu al corazón!
Pero, aunque yera el proetil bien duru,
tan duru, por mió suerte, yera el puru,
que la bala quedóse 'nel llancá
cual si fues boroña, esmigayá;
¡y gracies a aquel puru del estancu
non estiré la pata e' un barrancu!
Desque vi que libraba la pelleya
mangué el fusil y na metá la oreya
un balazu i solté a aquel perru moru,
que en tierra dió, gufando como un toru.
Adiós, mio pá. Eso va ya de remate:
si facemos nel próximu cumbate
que bailen los rifeñus el cán-cán
podrá abrazáte pronto el tó fíu.